今季馬季煞科，首先多謝各位讀者對「癲馬路路發」及本專欄的支持，亦請各位在抖暑期間多留意本馬網及來季記得繼續支持，祝大家在煞科日標尾會成功，豐收放暑假，多謝大家！
今日焦點落在兩個四屆冠軍騎師潘頓及莫雷拉身上，各自也取得132場頭馬，而現在潘頓只領先半場，如莫雷拉在頭馬數字上領先才可以成為今屆冠軍騎師，料今日兩位會有惡鬥。
練馬師方面，從練了五季的羅富全以六場頭馬領先蔡約翰，雖然雙方都佈下馬海，各有12匹正選馬列陣，除非是大奇蹟日，相信都好難反先；而在新制度下有三位練馬師要護級，何良仲有兩場先畢業，今日出馬四匹，牌面馬亦有，攞兩Win要靠運數；尚差一場頭馬才上岸的徐雨石，贏了21Win仍要護級! 今日六匹參戰馬中只要頭場較似樣；鄭俊偉也是受害的一個，贏了17場以舊制計已上了岸，在玩人的新制度下，護級無望。
第八場一班1600米
上場於直路上受困後，最後百五米才能真正騎到的「都靈太陽」，只以短馬頭位負於「飛輪閃耀」而屈居亞軍，潘明輝已盡了最大努力為馬匹爭取最佳名次，今次出到潘頓，孭121磅排四檔，只要走到好位，加埋強手壓陣，補中機會大。
未勝但準繩的「發財先鋒」，只有初出一場落第外，之後的八場全有獎金，更有六次入三甲，近兩場更跑入Q，今次縮程兼初跑一哩，有爭冠軍的莫雷拉之助，孭118磅排五檔，勝在跑法機動，且看能否頂得住前駒的後勁。
第九場三班1200米
由方嘉柏轉到蘇偉賢馬房的「佐治勇駒」，近仗在此程已展現了追勢，只是未能入圍，直至上場跑出了水準，負於守前發力在先的「祥勝霸駒」個半馬位得第二名，卻可比今季識贏的「連連有盈」及「夢巴黎」先過終點，今場配何澤堯，孭121磅排六檔，比以往做更多功夫出嚟跑，總共跳了四課，追勢凌厲，今次休息期亦比以往長，有心在煞科日開齋贏番場。
初出即勝的「運高八斗」上次贏的對手不算差，以兩又四分一馬位贏第二名的「閃電俠」，勝後加十分上三班，繼續由田泰安策騎，孭121磅排十檔，要睇田泰安在之前場次的表現是否手風順，佢一無可以成日無晒，計馬如順利跟到前面，亦要睇會否消耗太多腳程先埋到嚟，有隱憂及初跑三班步速，所以只作副選。
第十場二班1200米
六戰得四冠一亞一季，全入三甲的「金鑽貴人」，前仗初跑田草千四也可取勝，上場回到谷草千二米，不敵追上的「齊齊友福」得亞軍，今次初跑田草千二米，回配潘頓孭124磅，跟前跑的馬匹排在十檔，如出閘後順利搶到前面的位置，亦屬坐二望一的馬匹，但首次排在比以往外的檔位，隔離檔有「駿馬風采」、二檔有「遨遊戰士」會頂佢，必成熱門要搏前面有好際遇。
冷門吼隻好難贏的「醒臣」，自上季在二班贏馬後，一直未再有頭馬見面，今仗配三騎有一次入Q及一次跑第四的波健士，孭116磅排七檔，對手雖然強，但好多在今季都搏多了，如前駒因檔位的問題有咩閃失，今季硬仗少的「醒臣」有機會出冷。
馬王六環彩提供
第六場 | 2 縱橫天下 | 12 揚揚大道 |
第七場 | 3 極速飛彈 | 13 美麗攻略 |
第八場 | 7 都靈太陽 | 9 發財先鋒 |
第九場 | 13 運高八斗 | 14 佐治勇駒 |
第十場 | 6 金鑽貴人 | 12 醒臣 |
第十一場 | 4 信心之選 | 7 隱形翅膀 |
(馬王 16/7/2022)
Comments