在一些多多限制的防疫制度下，筆者已經超過一年無入過馬場，解除部分規條後趁元旦賽馬日入場觀賽，不過在公眾席內三步一崗、五步一哨的嚴密監管口罩令，唔通真係有人會講：「監管我啦，監管我啦，我無問題㗎!」觀看一場過後覺得無癮，打道回府好過。
第六場四班1200米
已跨季連續四場入三甲的「黃腳鱲」，上場入Q雖然被頭馬拋離個半馬位，但也甩開第三名的馬匹一個馬位，以往在短途無論是泥地或谷草、內檔或外檔都會走入圍，繼續有今季曾三度替此駒上陣的何澤堯，排十檔索性留住追，跑回上場的追勢，可望取得首場頭馬。上場一轉谷草此程終於開齋的「電子兄弟」，在蘇兆輝胯下可以一放到底，雖然贏的對手只是平庸貨色，放頭馬在谷草短途有一定的優勢，如遇場地偏差更可食正地利，今次仍有內檔幫手，無馬干擾之下又可自行領放，靜了兩期的蘇兆輝頭兩場也有實力馬在手，望今晚能破悶局。
第七場四班1000米
此程最好的「威妙星」今次唞了五個星期才再次上陣，今季先在田草直路跑兩場也有一亞一殿，之後回到此程僅僅放到，雖然由潘頓換上OK哥，自平安夜日賽墜馬，靜了一次夜馬後，元旦日已有馬贏，今場雖然快馬多，此駒有一檔之助，可望最快擺到頭領放，負頂磅也可以坐二望一。上場未算十足也首次入Q的「至尊高飛」，而上次是沿途走蝕位，返嚟也只是以半個馬位落第，出賽三次皆有獎金，而名次亦仗比仗提升，今次用埋潘頓可見想盡快交代，今晚只有六匹坐騎的潘頓，以第五場的「凌厲」、尾場的「英雄豪邁」及此駒最具勝望。
第九場三班1200米
今仗增程上谷草千二米一試的「英雄豪邁」(上圖)，出賽三次得一冠兩季，前仗贏馬一役的谷草短途大利放頭馬，而「英雄豪邁」可以由中間位置追上收韁贏馬，上場因留得太後，走外疊蝕位追上得第三名，今次回配贏馬拍檔潘頓，晨課所見越來越放鬆，適應得好快，一千米都衝得好，跑千二米亦會合適，排內檔有助先守好位搵遮擋會更好跑，所以首次增程也有贏馬之道。半冷敲隻「常常有餘」，上場名次上雖然是跑第五名，只是以四分三馬位負於出閘最快放到的路程專家「終身美麗」，上季在三班此程可以兩WIN，今季在此程跑了四場已與頭馬的距離越來越接近，繼續由布文執韁，迫得出其後勁有權提升名次。
馬王六環彩提供
第四場 | 8又享耆成 | 9包裝大聖 |
第五場 | 1凌厲 | 11美滿星雲 |
第六場 | 6黃腳鱲 | 9電子兄弟 |
第七場 | 1威妙星 | 4至尊高飛 |
第八場 | 4大力猴王 | 7天寅合一 |
第九場 | 2常常有餘 | 3英雄豪邁 |
(馬王 4/1/2023)
Comments