下次賽期是年三十跑日馬都算破天荒，為咗賽期要提早十二點十五分開跑，五點跑尾場，冬天五點已開始天黑，天氣冷人情更冷，馬會的安排真係未到年初三就赤口，冷漠無情令一眾賽馬從業員疲於奔命，收得工嚟、塞得車嚟，住得遠的都要成七點先返到屋企，不如改頭場由飲早茶開始跑，飲完下午茶散場，大sell溫情! 所以勸大家不如玩少一日，如常去辦年貨、食團年飯、佈置家居，準備與家人迎接新一年，所以在尤達老總的最高指示下，當日"癲馬路路發"會休息一天，大家準備過新年，年初三啟市同各位馬迷拜年。
第四場四班1200米
狀態長期見好的「鼓浪精綵」今季五戰此程不失前四名，大前仗由蘇兆輝取得首場勝仗，上場只以一條頸位負於「南莊加好」，在四班此程已是必揀的馬膽，放得出跑法更好，就算守到好位，直路一俾就有，憑鬥心力拼上前，今場的八檔會走二疊，仍是拖Q必揀的對象。上場贏五班的「淺草飛」終於取得勝仗，而且是跑出三班的時間贏馬，今次升班先是孭少十三磅，潘頓選擇此駒上陣，必定是心中有馬，黎昭昇今晚出四駒有三匹是配潘頓，騎練加強合作，可包辦第四口孖寶。
第五場四班1200米
應該是全晚最熱的「亞洲籐王」，上場出閘唔算快都自動波走上嚟，仲取得連捷，今季兩冠兩亞後仍在四班作賽，演出勝在夠穩定及晨課跳過仍是勇銳，黎昭昇十場頭馬中潘頓佔了三場，這匹上次由潘頓贏開的穩定賽駒，今場大可贏馬升班。兩出都入圍的「好玩奇兵」今次又抽大外檔，前仗排十一檔守中間位追入第三名，上場排十二檔放頭跑放入第三名，今次由潘頓換上布文戰鬥力不減，只是現階段在進度未必夠前駒跑，仍有好手坐陣可望提升名次。
第八場三班1000米
上季尾因腳傷要接受手術的「華麗活力」(上圖)，於249場次復出，排在大外檔都可以追入第三名，負於今次又再同場的「加州得力」一又四分三馬位，甩開第四名的「精彩勇士」兩個多馬位，反映腳傷已痊愈，今次排檔轉好，抽到四檔，潘頓繼續替此駒上陣，於四班此程可以兩連捷，四歲馬在三班也可入圍，應該仲有進步空間，與後駒加分加磅後的差距，可搏反先。此程兩連捷的「加州得力」，今次要孭134磅上陣，後追馬排在一檔，雖然前面多快馬預計步速會快，對其跑法會有利，三歲馬孭接近頂磅可能加得太急，同埋會太熱，如霍宏聲走位醒目，會是前駒最大的威脅。
馬王六環彩提供
第三場 | 5九龍神駒 | 11奇妙年華 |
第四場 | 6鼓浪精綵 | 11淺草飛 |
第五場 | 2亞洲籐王 | 6好玩奇兵 |
第六場 | 1合夥年代 | 6躡景追飛 |
第七場 | 5智勇神駒 | 6天天得樂 |
第八場 | 2加州得力 | 4華麗活力 |
| | |
(馬王 18/1/2023)
Comments