小組尺度不一，華將必定損失，潘明輝因「都靈太陽」轉彎時沒有移出望空衝刺，被小組嚴厲譴責，儘管直路被困，但見騎者仍努力策騎而入Q，小組事後更”打電話問功夫”！再睇同日第九場的世界膽，由莫雷拉策騎的「烈風」跑第六名，大家覺得取位及跑法如何？入彎時都有塞，走入面卻未能交出應有的追勢；順帶一提同場策騎「一先生」的田泰安又跌鞭，原來已是他今季在陣上第六次跌鞭罰了一萬元，如果是華將又會點呢？
第四場四班1200米
上陣了五次的「齊天大聖」，近三仗轉到谷草千二米後，得三至五名各一次，兩度負於路程專家「有主意」，上場於早段失去左前蹄蹄鐵，又被「飛騰騅」干擾至內閃及失蹄，返嚟以第四名過終點，今次同樣由蔡明紹孭頂磅作賽，繼續有內檔，排三檔對於這匹第二度在四班跑的前置馬匹會好跑，文家良馬房今晚亦有「濃有」、「星叻無敵」、「神速奔馳」及尾場的「金鑽貴人」配合出擊，這匹「齊天大聖」可作為馬房頭馬的重心之一。
今季仍未贏馬的「晉神」，近四場由星期日又跌鞭的甩韁王田泰安跑已開始接近，連大前仗排在大外檔起步亦追入Q，今場有潘頓之助，孭124磅排七檔，配搭上先由弱轉強，馬匹多跑之下狀態已嚟返，排檔適中走生位，減分已多不用負重，相信仍會入圍。
第七場三班1200米
首配潘頓上陣的「神速奔馳」上場初試田草千二米，於出閘時的意外已失先機，五戰中得兩WIN兩Q後首次落第，賽後潘頓試閘輕鬆得第二名，亦有親自兩課快操，勇態畢現，今場孭131磅排六檔，初跑谷草有強手壓陣，配合馬房攻勢而來，只要出閘順利搶到前面的位置跑，已有糊叫。
跑了三季的五歲馬「極速奔馳」，上場在四班取得第二WIN後，首次在三班作賽亦由潘明輝追入第二名，雖然負於「自力更生」兩個半馬位，但與第三名的「終身美麗」都甩開後面的馬匹兩個馬位，今場再由火車潘上陣，孭117磅排二檔，今季穩定絕少大敗，八戰中只有一次失獎金，FIT足全季，季尾特佳，加上姚本輝馬房已連贏了八天，如場地利追再贏也不奇。
第八場三班1650米
今場有近績好的馬多，選馬範圍會闊，先取上場贏得輕鬆的「包裝大獎」，全程走外疊都可以以一條頸位頂住追上嚟挑戰的「總理」，雙雙彈甩後面群駒贏馬，此駒自上季在希斯馬房贏馬流鼻血後，今季轉到何良馬房後亦可在此程交出3Win，今仗繼續由潘明輝策騎，孭131磅排八檔，此駒贏馬分別排在八檔及九檔，睇嚟三班留不住，可替馬房追數。
季尾亦可吼未交代的馬匹，自配上今仗騎師周俊樂後，近兩場輸不足一個馬位而跑第三名的「健康在望」，前仗追不及「合約精神」負四分三馬位，上場就半個馬位被「焱焱元帥」所擒，今場同樣孭119磅，排在四檔，一向襟搏的六歲馬比起上兩場出賽休息期長，評分亦回到贏馬時的水平，可搏繼續有好表現。
馬王六環彩提供
第四場 | 1 齊天大聖 | 8 晉神 |
第五場 | 5 世澤歆星 | 7 帝豪大師 |
第六場 | 4 星叻無敵 | 6 特攻 |
第七場 | 3 神速奔馳 | 12 極速奔馳 |
第八場 | 1 包裝大獎 | 5 健康在望 |
第九場 | 5 金鑽貴人 | 11 志勝時機 |
(馬王 22/6/2022)
回覆轉寄
Comments